ރާއްޖޭގެ ޑިޖިޓަލް އިކޮަނޮމީ ފުޅާ ކުރުމަށްޓަކައި "މޯލްޑިވްސް ޑިޖިޓަލް ޕާޓްނާޝިޕް" އެއްބަސްވުން އެކުލަވާލައިފިއެވެ.
މި އެއްބަސްވުން އެކުލަވާލާފައިވަނީ މިނިސްޓްރީ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ (ނޭޝަނަލް ސެންޓަރ ފޮރ އިންފޮމޭޝަން ޓެކްނޮލޮޖީ)، މާސްޓަރ ކާޑް އަދި ބޭންކް އޮފް މޯލްޑިވްސްއާ ދެމެދުއެވެ.
ފަސް އަހަރު ދުވަހުގެ މުއްދަތަށް ދެމިގެންދާ މި އެމް.އޯ.ޔޫގެ ދަށުން މައިގަޑު 7 ދާއިރާއިންމަސައްކަތްތަކެއް ކުރުމަށްވަނީ އެއްބަސްވެފައެވެ.
އޭގެ ތެރޭގައި ހިމެނޭ އެއް ކަމަކީ އެން.ސީ.އައި.ޓީ އިން ތަރައްޤީކޮށް ބަލަހައްޓަމުންދާ ދިވެހިރާއްޖޭގެ ޤައުމީ ޑިޖިޓަލް އައި.ޑީ ގެ ނިޒާމް ކަމަށްވާ އީފާސް އާއި ސްމާޓް އައި.ޑީގެ ތެރެއިން އިލެކްޓްރޯނިކްކޮށް ނުވަތަ ޑިޖިޓަލްކޮށް ފައިސާގެ މުއާމަލާތްތައް ހިންގޭނެ ހަރުދަނާ ސިސްޓަމްތަކެއް ޤާއިމްކުރުމެވެ.
އަދި މާސްޓަރ ކާޑްގެ ފަންނީ ތަޖުރިބާ ހިއްސާކޮށް އޭގެ އެހީގައި ދިވެހިރާއްޖެއަށް ކުރިއެރުން ހާސިލްކުރެވޭނެ ގޮތްތައް ހޯދައި މި ތިން މުއައްސަސާއިން ގުޅިގެން މަސައްކަތް ކުރެވޭނެމަގު ހުޅުވިގެންދާނެއެވެ.
