އުރީދޫ މޯލްޑިވްސްއިން އިންތިޒާމު ކުރާ އުރީދޫ ފަން ރަން ހުޅުމާލޭގައި މިއަދު ބާއްވައިފި އެވެ.
ދައުލަތުގެ ބައެއް ވަޒީރުންނާއި ސަރުކާރުގެ ބައެއް އިސްވެރިންނާއި އުރީދޫގެ އިސްވެރިންގެ އިތުރުން ގިނަ އަދަދެއްގެ އާންމުންވެސް ފަން ރަންގައި ބައިވެރިވެފައިވެ އެވެ.
ފަން ރަންގައި ބައިވެރިވެ ދުވުން ނިންމި މީހުންނަށް އުރީދޫ އިން ވަނީ ހާއްސަ މެޑަލްއެއް ދީފަ އެވެ.
އުރީދޫ ފަން ރަން އަކީ މުޖުތަމައުގެ ދުޅަހެޔޮކަމާއި އެއްބައިވަންތަކަން ފާހަގަކުރުމުގެ ގޮތުން ކުރިއަށް ގެންދާ ހަރަކާތެކެވެ.
ރާއްޖޭގައި އެންމެ ގިނަ ބަޔަކު ބައިވެރިވާ މި ދުވުމަކީ ހުރިހާ އުމުރެއްގެ މީހުންނަށްވެސް މަޖާކޮށްލެވޭ ގޮތަށް ފަރުމާކޮށްފައިވާ 5ކޭ ދުވުމެކެވެ.
އުރީދޫ ފަން ރަންގައި ކޮންމެ ކިލޯމީޓަރެއް ދުވެ ނިމުމުން، ބެހެއްޓިފައިވާ ސްޓޭޝަންތަކުގައި، ކުލަގައިގެ އިތުރުން ފެން އަދި މަޖާ ހަރަކާތްތަކެއް ކުރިއަށްދެ އެވެ. މިއީ ވަކި ވަގުތެއްގެ ތެރޭގައި ނިންމަން ޖެހޭ ރޭހަކަށް ނުވާތީ ހިނގާފައި، ޖޮގްކޮށްފައި، ދުވެފައި ނޫނީ ނަށަމުންވެސް މި ދުވުން ނިންމުމުގެ ފުރުސަތު އޮވެ އެވެ.
އުރީދޫ ފަން ރަން އަކީ ކޮންމެ އަހަރަކު އުރީދޫއިން ބާއްވަމުންދާ ހަރަކާތްތަކުގެ ތެރެއިން އާއްމުންގެ މެދުގައި އެންމެ މަޤުބޫލު އެއް ހަރަކާތެވެ.
