ގްރީން ޓެކްސްގެ ގޮތުގައި މިދިޔަ އަހަރު ލިބުނު އާމްދަނީ 108 ޕަސެންޓް އިތުރުވެއްޖެ އެވެ.
މީރާއިން އާންމުކުރި މިދިޔަ އަހަރުގެ ޑިސެމްބަރު މަހުގެ އާމްދަނީގެ ތަފާސްހިސާބު ދައްކާ ގޮތުން މިދިޔަ އަހަރު ގްރީން ޓެކްސްގެ ގޮތުގައި ދައުލަތަށް 146.5 މިލިއަން ޑޮލަރު (2.2 ބިލިއަން ރުފިޔާ) ލިބުނެވެ.
މިއީ 2024 ވަނަ އަހަރު ގްރީން ޓެކްސްގެ ގޮތުގައި ލިބުނު 70.4 މިލިއަން ޑޮލަރު (1.08 ބިލިއަން ރުފިޔާ) އަށްވުރެ 76 މިލިއަން ޑޮލަރު (1.17 ބިލިއަން ރުފިޔާ) އިތުރުވުމެކެވެ.
ރާއްޖޭގެ ތިމާވެށި ހިމާޔަތްކުރުމުގެ އެކި މަސައްކަތްތަކަށް ފައިސާ ހޯދުމަށް ގްރީން ޓެކްސް ނަގަން ފެށީ އޮކްޓޯބަރު 2016 އިން ފެށިގެންނެވެ.
ގްރީން ޓެކުހަކީ ރާއްޖޭގައި ހިންގާ ޓޫރިސްޓު ރިޒޯޓުތަކާއި ހޮޓާތަކާއި ގެސްޓްހައުސްތަކުގެ އިތުރުން ޓޫރިސްޓް އުޅަނދުތަކަށް އަންނަ ފަތުރުވެރިންގެ އަތުން ނެގޭ ޓެކުހެކެވެ.
އެ ގޮތުން ޓޫރިސްޓް ފެސިލިޓީއެއްގައި ފަތުރުވެރިއަކު ހުންނަ ކޮންމެ ދުވަހަކަށް މި ޓެކްސް ނަގަ އެވެ.
ގްރީން ޓެކްސް ނަގާ ރޭޓްތައް
ޓޫރިސްޓް ރިޒޯޓް – 12 ޑޮލަރު
އިންޓެގްރޭޓެޑް ޓޫރިސްޓް ރިޒޯޓް – 12 ޑޮލަރު
ޓޫރިސްޓް ހޮޓާ – 12 ޑޮލަރު
ރިޒޯޓް ހޮޓާ – 12 ޑޮލަރު
ހޮޓާ (މީހުން ދިރިނޫޅޭ ރަށެއްގައި ހުރި، ނުވަތަ، 50 ކޮޓަރިއަށްވުރެ ގިނަ ކޮޓަރި ރަޖިސްޓަރީކޮށްފައިވާ ހޮޓާތައް) – 12 ޑޮލަރު
ހޮޓާ (މީހުން ދިރިއުޅޭ ރަށެއްގައި ހުރި 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓަރީކޮށްފައިވާ ހޮޓާތައް) – 6 – ޑޮލަރު
ޓޫރިސްޓް އުޅަނދު – 12 ޑޮލަރު
ޓޫރިސްޓް ގެސްޓްހައުސް (މީހުން ދިރިނޫޅޭ ރަށެއްގައި ހުރި، ނުވަތަ، 50 ކޮޓަރިއަށްވުރެ ގިނަ ކޮޓަރި ރަޖިސްޓަރީކޮށްފައިވާ ގެސްޓްހައުސްތައް) – 12 ޑޮލަރު
ޓޫރިސްޓް ގެސްޓްހައުސް (މީހުން ދިރިއުޅޭ ރަށެއްގައި ހުރި 50 ކޮޓަރި ނުވަތަ އެއަށްވުރެ މަދު ކޮޓަރި ރަޖިސްޓަރީކޮށްފައިވާ ގެސްޓްހައުސްތައް) 6 – ޑޮލަރު
އެ ނޫން ވެސް އެފަދަ ތަންތަން – 12 ޑޮލަރު
މި ޓެކްސް އިން އިސްތިސްނާ ވަނީ އުމުރުން ދެ އަހަރު ނުވާ ކުޑަކުދިންނެވެ.
