ގ. ރަނައުރާގެއާގެ، ހައްވާ ޔުމްނު ރަޝީދު (21 އ) މިމަހުގެ 18 ވަނަ ދުވަހު އިމާރާތަކުނ ްވެއްޓި ބޮޑެތި އަނިޔާތަކެއް ލިބުމާ ގުޅިގެން އެ ހާދިސާ ތަހުގީގު ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އުފެއްދެވި ހާއްސަ ކޮމިޝަންގެ މެންބަރު އަދި މަޝްހޫރު ކަށީގެ ޑޮކްޓަރު މުހައްމަދު ހަބީބް އިސްތިއުފާ ދެއްވައިފި އެވެ.
ADS BY OOREDOO
ރިޔާސީ ކޮމިޝަން އުފެއްދެވިތާ ތިން ދުވަސް ތެރޭގައި ހަބީބް އިސްތިއުފާ ދެއްވާފައި މިވަނީ ޔުމްނު ވެއްޓުނު ހާދިސާއާއި ގުޅިގެން ފުލުހުން މިހާރު ހައްޔަރުކޮށްފައިވާ ގ. އެރިޔަދޫ، ރައުދު އަހްމަދު ޒިލާލް (21 އ)ގެ މަންމައާއި ހަބީބްއާ އާއިލީ ގޮތުން ގުޅިފައިވާތީ ކަމަށް މައުލޫމާތު ލިބެ އެވެ.
ރައުދުގެ މަންމައާއި ހަބީބް އަކީ އައްޑޫ ސިޓީގެ ހިތަދޫއަށް ނިސްބަތްވާ ދެ މީހުންނެވެ.
މީގެއިތުރުން ޔުމުން ވެއްޓުނު މައްސަލައިގައި ފުލުހުން ފުރުން މަނާކޮށްފައިވާ މީހުންގެ ތެރޭގައި ހިމެނޭ ހ މީނާޒު، ޔޫސުފް ޔައްސާރު އަބްދުލްޣަފޫރުގެ މަންމަ ހާލާ ހަމީދާއި ޑރ. ހަބީބަކީ ކްލާސްމޭޓުން ކަމަށްވެސް އެނގިފައިވެ އެވެ.
ރިޔާސީ ކޮމިޝަންގައި ހަބީބްގެ އިތުރުން ރައީސް މުއިއްޒު ހިމަނުއްވާފައިވަނީ ކުރީގެ ބަންޑާރަނައިބް ޑރ. މުހައްމަދު މުނައްވަރާއި ބްރިގޭޑިއާ ޖެނެރަލް ރިޓަޔާޑް އަހްމަދު މުހައްމަދު އެވެ.
ރައީސް ގަރާރަކުން އުފެއްދެވި ކޮމިޝަނަށް ގާނޫނީ ބޮޑެތި ބާރުތަކެއް ދެއްވުމަށްފަހު ކޮމިޝަންގެ ރައީސަކަށް ހަމަޖައްސަވާފައިވަނީ ޑރ. މުނައްވަރު އެވެ.
